У Віцебску створаны Цэнтр для лячэння дзяцей з прыроджанымі сківічна-асабовымі паталогіямі

0 32

        У Віцебску створаны Цэнтр для лячэння дзяцей з прыроджанымі сківічна-асабовымі паталогіямі
Фота носіць ілюстрацыйны характар. З адкрытых крыніц.

Віцебскі абласны цэнтр аказання медыцынскай дапамогі пацыентам з прыроджанай паталогіяй сківічна-тваравай вобласці пачаў працу ў верасні. Асаблівасць новай медустановы ў аб’яднанні спецыялістаў рознага профілю пад адным дахам,  у Віцебскай абласной дзіцячай клінічнай бальніцы. Раней маленькіх пацыентаў аперыравалі ў стаматалагічным аддзяленні дарослай Віцебскай абласной клінічнай бальніцы.

 


        У Віцебску створаны Цэнтр для лячэння дзяцей з прыроджанымі сківічна-асабовымі паталогіямі
Кіруе цэнтрам Арына Кабанава, загадчыца кафедры сківічна-тваравай хірургіі і хірургічнай стаматалогіі з курсам ФПКіПК ВДМУ, доктар мед. навук, дацэнт. Урач займаецца хірургіяй прыроджанай сківічна-тваравай паталогіі больш  за 10 гадоў.

 

Арына Аляксандраўна, раскажыце, як ствараўся цэнтр…

 

У форме цэнтра мы першыя ў Беларусі. Наша ўстанова невялікая, з двума кансультатыўнымі кабінетамі. Аперацыі праводзім у дзіцячым лор-аддзяленні. Цешыць, што ў дзіцячай бальніцы створаны ўсе ўмовы для аказання кваліфікаванай дапамогі дзецям з прыроджанай паталогіяй сківічна-тваравай вобласці.

 

Там назапашаны вялікі вопыт працы з дзецьмі, ёсць неабходнае абсталяванне. Нас вельмі падтрымліваюць  галоўны ўрач ВАДКЦ Галіна Пузанава, намеснік галоўнага ўрача Аляксандр Піткевіч, загадчыца дзіцячага лор-аддзялення Ганна Якімцова. Без іх мы нічога не зрабілі б…

 

Якія паталогіі вы лечыце? І ці можна абысціся без аперацыі?

 

Найбольш частыя выпадкі — гэта дзеці з прыроджанай расколінай паднябення і расколінай губы, радзей сустракаюцца з сіндромам П’ера Рабэна. Аперацыі прызначаюць дзецям з трох месяцаў. Паталогіі можна выправіць толькі хірургічным шляхам. У Беларусі на тысячу нованароджаных адно дзіця будзе з паталогіяй.

 

Калі не аперыраваць, то ў далейшым будуць праблемы з маўленнем і хранічныя захворванні лор-органаў, парушэнні спажывання ежы. Пагоршыцца якасць жыцця, бо поласць  рота і поласць носа не раз’яднаныя, як у здаровага чалавека, а ўяўляюць адзіную прастору. Натуральна, гэта праблема, якой трэба пазбавіцца.

 

Як пацыенту патрапіць у ваш цэнтр?

 

Спачатку трэба зрабіць самае простае: патэлефанаваць і запісацца на бясплатную комплексную кансультацыю, якая даступна любому дзіцяці, прапіска не мае значэння. Інфармацыя пра нас ёсць на сайце ВДМУ і на сайце ВАДКЦ. Запісваюцца на кансультацыі з іншых абласцей, і мы нікому не адмаўляем. Асноўная наша задача — аказанне дзецям якаснай дапамогі, якую яны раней атрымлівалі разрознена і не ў поўнай меры. З нашымі рэкамендацыямі ідуць у сваю паліклініку па месцы жыхарства.

 

Якія спецыялісты ў вас кансультуюць?

 

Сківічна-тваравы хірург, отарыналарынголаг, стаматолаг, стаматолаг-артадонт, лагапед. У залежнасці ад вынікаў агляду складаецца агульны план лячэння. Аперацыя — адзін з этапаў комплекснай рэабілітацыі. Пасля прызначэння даты аперацыі бацькі па месцы жыхарства дзіцяці збіраюць аналізы і з накіраваннем ад педыятра прыязджаюць да нас.

 

Зрабілі аперацыю, а далей што?..

 

Да 18 год дзеці знаходзяцца ў нас пад наглядам, перыядычна бацькі прывозяць  іх на кансультацыю. Нашы спецыялісты праводзяць з дзецьмі заняткі, даюць лагапедычныя рэкамендацыі, назіраюць за прыкусам. Магчыма, ім спатрэбяцца паўторныя аперацыі, другая і трэцяя. Спачатку ж закрываем анатамічны дэфект, а пасля праводзім эстэтычную карэкцыю. Далей дзіця чакае карэкцыя маўлення, заняткі з лагапедам, нашэнне брэкетаў ці пласцінак, лекаванне зубоў. Падтрымаць здароўе могуць толькі комплексныя меры.

 

Якія планы на будучыню?

 

Плануем пашырацца праз узаема-дзеянне са спецыялістамі іншых абласцей і гарадоў, правядзенне адукацыйных семінараў і майстар-класаў для ўрачоў, якія сутыкаюцца з паталогіяй у раёнах.

 

Источник: medvestnik.by

Оставьте ответ

Ваш электронный адрес не будет опубликован.